हारूनभाई इनामदार व सिताताई बनसोड यांची
दर्जेदार कामासाठी संबंधितांना सूचना; कानडी रोडवरील नाल्याच्या कामाला गती;
केज, दि. २ सप्टेंबर : केज शहरातील कानडी रोडवरून समर्थ नगरला जोडणाऱ्या नाल्याचे काम सुरू असतानाच नाला खचल्याने परिसरातील नागरिक, व्यापारी, विद्यार्थी व स्थानिक कार्यकर्त्यांमध्ये नाराजीचे वातावरण निर्माण झाले होते. कामाच्या दर्जाबाबत तसेच संबंधित गुत्तेदाराच्या कार्यक्षमतेबाबत प्रश्न उपस्थित करत यासंदर्भात वृत्तपत्रांमधूनही बातम्या प्रसिद्ध झाल्या होत्या.
या पार्श्वभूमीवर जनविकास आघाडीचे नेते हारूनभाई इनामदार व नगराध्यक्षा सिताताई बनसोड यांनी घटनास्थळी भेट देऊन पाहणी केली. यावेळी त्यांनी संबंधित प्रशासकीय अधिकारी व गुत्तेदार यांना कामाच्या दर्जाबाबत धारेवर धरत, नाल्याचे काम दर्जेदार पद्धतीने पूर्ण करून वाहतूक लवकरात लवकर सुरळीत करण्याच्या सूचना दिल्या.
या सूचनांची दखल घेत संबंधितांनी नाल्याचे काम पुन्हा सुरू केले आहे. त्यामुळे कानडी रोड व समर्थ नगर परिसरातील नागरिकांना मोठा दिलासा मिळाला असून, रखडलेले काम मार्गी लागल्याबद्दल परिसरातील नागरिकांनी समाधान व्यक्त केले आहे.
दर्जेदार काम होऊन वाहतूक सुरळीत व्हावी, अशी अपेक्षा
नागरिकांकडून व्यक्त होत आहे.
