कृषि सहाय्यक आणि शेतकऱ्यांनी श्रमदानातून बांधला वनराई बंधारा
गौतम बचुटे/केज :- केज तालुक्यातील माळेगाव येथे कृषी सहाय्यक आणि शेतकऱ्यांनी श्रमदानातून वनराई बंधारा बांधला.
या बाबतची माहिती अशी की, केज तालुक्यातील माळेगाव येथे कृषि सहाय्यक कमलाकर राऊत यांनी शेतकऱ्यांना वनराई बंधारा आणि त्याचे फायदे यासह वनराई बंधारा बांधण्यासाठी लागणारे साहित्य आणि त्या बाबतची तांत्रिक माहिती देवून कोणत्याही खर्चा शिवाय आणि उपलब्ध व टाकाऊ साहित्यातून त्याची निर्मिती करता येते. शेतातील ओढे, नाले यांद्वारे वाहून जाणारे पाणी सिंचनासाठी वापरता येते. या बाबत शेतकऱ्यांना मार्गदर्शन केले. तसेच शेतकऱ्यांनी वनराई बंधारा उभारण्यासाठी शेतकऱ्यांना प्रवृत्त केले. त्या नुसार माळेगाव येथील उपक्रमशील शेतकरी यशवंत दोडके आणि स्वतः कृषि सहाय्यक कमलाकर राऊत यांनी श्रमदान करून खत आणि सिमेंटच्या रिकाम्या गोण्यात शेतातील काळी माती भरून शेतातील वाहणारा नाला अडवून वनराई बंधारा उभारला आहे. या बंधाऱ्यात चांगलाच पाणीसाठा झाला असल्याने त्याचा वापर रब्बी पिकांच्या सिंचनासाठी करता येईल.
——————————————————–
तालुक्यात असे वनराई बंधारे उभारण्या संबंधी आमचे अधिकारी व कर्मचारी हे तांत्रिक माहिती देवून मदत करतील. त्यामुळे व्यर्थ वाहून जाणारे पाणी आपल्या पिकांसाठी वापरता येईल.
—- सागर पठाडे,
तालुका कृषि अधिकारी, केज
———————————————————-
शेतकऱ्यांनी व तरुणांनी ओढे, नाले यावर अशा प्रकारे वनराई बंधारे बांधावे. त्यातील पाणीसाठ्याचा वापर करून रब्बी हंगामातील उत्पन्न वाढ होवू शकते.
—- कमलाकर राऊत,
कृषि सहाय्यक
——————————————————–
