चिंचोली फाट्यावर मराठा आरक्षणाच्या मागणीसाठी रस्ता रोको
गौतम बचुटे/केज :- मराठा आरक्षणासाठी केज-
कळंब रोडवरील चिंचोली पाटी येथे भोपला, वरपगाव, चिंचोली माळी येथील सकल मराठा बांधवांनी रस्ता रोको आंदोलन केले.
दि. १५ सप्टेंबर रोजी सकाळी ११:०० च्या सुमारास भोपला, वरपगाव आणि चिंचोली माळी या परिसरातील नागरिकांनी रस्त्यावर टायर पेटवून प्रचंड घोषणाबाजी करीत रस्ता रोको आंदोलन केले. या आंदोलनामुळे महामार्गावर वाहतूक खोळंबून मोठ्या प्रमाणावर वाहतूक विस्कळीत झाली होती.
या आंदोलनात विजयसिंह जाधव भोळेकर, शिवाजी दादा ठोंबरे, बाळासाहेब गलांडे, संतोष ढोबळे, सुनील देशमुख, उमेश यादव, प्रमोद जाधव, विलास जाधव, मारुती चंदनशिव, राम चंदनशिव, नितीन गोंड, मनोज गोंड यांच्यासह सुमारे १०० ते १५० आंदोलक सहभागी झाले होते.
आंदोलन संपल्या नंतर पोलीस निरीक्षक बाळासाहेब पवार यांच्या मार्गदर्शनाखाली बिट जमादार बाबासाहेब बांगर यांनी खोळंबलेली वाहतूक सुरळीत केली.
