वीज वितरण कार्यालया समोर शेतकऱ्याचा अंगावर पेट्रोल ओतून आत्मदहन करण्याचा प्रयत्न !
सुरक्षा रक्षकाच्या दक्षतेमुळे अनर्थ टळला
गौतम बचचुटे/केज :- केज तालुक्यातील शेतकऱ्याला शेतातील वीज पंपाच्या विद्युत जोडणीसाठी वीज वितरण कर्मचाऱ्यांच्या अधिकाऱ्याने पैसे मागितल्याच्या कथित मागणीमुळे शेतकऱ्याने स्वतःच्या अंगावर पेट्रोल ओतून आत्मदहन करण्याचा प्रयत्न केला. परंतु सुदैवाने त्या ठिकाणी कर्तव्यावर हजर असलेले सुरक्षा रक्षक यांच्या दक्षतेमुळे पुढील अनर्थ टळला.
या बाबतची माहिती अशी की, मंगळवार दि. १७ मंगळवार जानेवारी रोजी धनराज सदाशिव घुले वय ३५ रा. टाकळी याने दुपारी १:०० केज येथील उपअभियंता वीज वितरण कार्यालया समोर अंगावर पेट्रोल ओतून आत्मदहन करण्याचा प्रयत्न केला. त्याने अंगावर पेट्रोल वरून घेऊन खिशातील आगपेटी काढून पेटवून घेण्याचा प्रयत्न करीत असताना त्या ठिकानी कर्तव्यावर हजर असलेले सुरक्षा रक्षक फुलचंद डापकर यांनी त्या शेतकऱ्याच्या हातातील काडीपेटी हिसकावून घेत अटकाव केला. त्यामुळे पुढील अनर्थ टळला आहे. दरम्यान आत्मदहन करणाऱ्या शेतकऱ्याने सांगितले की, धनराज घुले याने मागील दोन वर्षा पूर्वी त्याने आणि त्याच्या शेजारील दोन शेतकऱ्यांनी वीज जोडणीसाठी कोटेशन भरलेले आहे. परंतु अद्याप त्याला वीज जोडणी दिलेली नाही. त्यामुळे त्याचे पिकाचे नुकसान होऊन प्रचंड नुकसान झालेले आहे. या बाबत त्याने वीज वितरणाच्या अधिकाऱ्यांकडे चौकशी केली असता त्याला गुत्तेदाराकडे पाठविण्यात आले. गुत्तेदाराने त्याला ३५ हजार रु. ची मागणी केली. असा शेतकऱ्यांचा आरोप आहे.
दरम्यान या शेतकरी आत्मदहन करीत असल्याची माहिती प्राप्त होताच केज पोलीस ठाण्याचे श्रीकांत चौधरी, उमेश आघाव, शेख मतीन, दिलीप गित्ते, आवेज शेख, नितीन जाधव यांनी घटनास्थळी जाऊन धनराज घुले याला ताब्यात घेतले.
कोट :-
” सदर शेतकऱ्याला कोणीही अनाधिकृतरीत्या पैशाची मागणी केली नाही. तसेच १.३ योजनेत शेतकऱ्याने स्वखर्चाने गुत्तेदारांच्या मदतीने काम करून घेण्यासाठी रितसर पैसे लागतात असे त्याला गुत्तेदारानी सागितले असावे. तसेच सदर शेतकऱ्यास ए सी एफ मधून वीज जोडणी देण्यात येणार आहे परंतु त्याच्या अगोदर दोन शेतकरी आहेत.”
—- मुंडे, सहाय्यक उपअभियंता
वीज वितरण कंपनी
————————————————–
” गावातल्या स्थानिक राजकारणामुळे माझे वीज पुरवठ्याचे काम अडविले असल्याचीही शक्यता आहे.”
— धनराज घुले, शेतकरी
