केज नगरपंचायत अंतर्गत वार्ड क्रमांक ४ मधील नागरिकांच्या समस्या तीव्र
केज (प्रतिनिधी) –
केज नगरपंचायत अंतर्गत वार्ड क्रमांक ४ हा सध्या विविध मूलभूत समस्यांमुळे त्रस्त असून परिसराला समस्यांचे माहेरघरच बनल्याची भावना नागरिकांमध्ये व्यक्त होत आहे. रस्त्यांची दुरवस्था, नाल्यांची साफसफाई न झाल्याने साचलेले पाणी, तसेच पिण्याच्या पाण्याची तीव्र टंचाई यामुळे नागरिक हैराण झाले आहेत.
सार्वजनिक बोअरवेलवर पाण्याची टाकी बसविण्यात आलेली नसल्याने बोअरवेल वारंवार खराब होत असल्याचा आरोप स्थानिक नागरिकांनी केला आहे. त्यामुळे पाणी भरण्यासाठी महिलांना मोठी कसरत करावी लागत आहे.
कर्तव्यदक्ष नगराध्यक्षा म्हणून ओळखल्या जाणाऱ्या सौ. सिताताई बनसोड तसेच भावी नगराध्यक्ष म्हणून चर्चेत असलेले हारूनभाई इनामदार यांनी या भागाकडे तातडीने लक्ष देऊन नागरिकांच्या समस्या सोडवाव्यात, अशी मागणी सातत्याने होत आहे.
कानडी रोडवरील कामादरम्यान पाईपलाईन जागोजागी फुटल्याने मागील एक महिन्यापासून पाणीपुरवठा खंडित झाला आहे. याशिवाय रस्त्यांवरील अतिक्रमणामुळे वाहतुकीचे मार्ग अरुंद झाले असून नागरिकांना ये-जा करताना अडचणींचा सामना करावा लागत आहे.
वार्ड क्रमांक ४ मधील समस्या तातडीने सोडविण्यासाठी नगरपंचायत प्रशासनाने संबंधित नगराध्यक्षा, गटनेते व नगरसेवकांनी प्रत्यक्ष भेट देऊन पाहणी करावी व योग्य ती कार्यवाही करावी, अशी जोरदार मागणी स्थानिक नागरिकांकडून होत आहे.
केज नगरपंचायत अंतर्गत वार्ड क्रमांक ४ मधील नागरिकांच्या समस्या तीव्र
