शिवशंभु युवा प्रतिष्ठान व जनविकास फाउंडेशनतर्फे केजमध्ये भव्य शारदीय नवरात्र महोत्सव – स्वर्णगिरी मंदिर देखावा आकर्षणाचे केंद्रबिंदू
केज (प्रतिनिधी) – शिवशंभु युवा प्रतिष्ठान, समर्थनगर व जनविकास फाउंडेशन यांच्या संयुक्त विद्यमाने केज शहरात यंदा प्रथमच शारदीय नवरात्र महोत्सवानिमित्त स्वर्णगिरी मंदिराचा भव्य देखावा साकारण्यात आला असून, तो शहरातील नागरिकांचे विशेष आकर्षण ठरत आहे.
समर्थनगर येथे उभारण्यात आलेल्या या देखाव्याला महिला, लहान मुले व तरुण वर्ग मोठ्या संख्येने भेट देत आहेत. धार्मिक वातावरण, पारंपरिक सजावट व भक्तिभावाने भारलेली संध्याकाळ या देखाव्याच्या ठिकाणी अनुभवता येत आहे.
महोत्सवात दररोज महिला मोठ्या संख्येने सहभागी होत आहेत. त्या टिपरी नृत्य, भक्तीगीत, तसेच विविध सांस्कृतिक कार्यक्रम सादर करून वातावरण भक्तिमय करत आहेत. आयोजकांनी महिलांसाठी विविध स्पर्धांचे आयोजन केले असून, त्यांना प्रोत्साहनपर बक्षिसे देऊन गौरविण्यात येत आहे.
या उपक्रमाच्या माध्यमातून संस्कृती व परंपरेचे जतन करतानाच महिलांना मंच मिळवून देण्याचे कार्य आयोजक संस्था करत असल्याने शिवशंभु प्रतिष्ठान समर्थनगर येथील आयोजन समितीचे सर्वत्र कौतुक होत आहे.
हा उपक्रम शहरवासीयांसाठी एक पर्वणी ठरत असून, पुढील काही दिवसांतही मोठ्या प्रमाणात भाविक व नागरिकांनी या देखाव्याला भेट द्यावी, असे आवाहन आयोजकांनी केले आहे.
