केज तालुक्याला रेल्वे मार्गाशी जोडण्याची केजवासीयांची मागणी
केज : केज हे बीड जिल्ह्याचे सर्वात जुने तालुका ठिकाण आहे. केज तालुक्यात पालेभाज्या-फळभाज्या सोबतच आता नवीन वैज्ञानिक शेती प्रयोग करून फळांची व पिकांची निर्मिती केली जात आहे. मात्र आधुनिक स्पर्धेत टिकून राहण्यासाठी केज तालुक्यात दळ ण-वळणासाठी अनुकूल असणारी रेल्वेची सेवा उपलब्ध नाही.
सध्या केंद्र शासनाने धाराशिव-बीड-छत्रपती संभाजीनगर या 240 किमी च्या प्रस्तावित रेल्वेमार्गाच्या सर्वेक्षणाला 14 फेब्रुवारी 2025 च्या पत्रानव्ये मंजुरी दिली आहे. या अंतर्गत हा मार्ग धाराशिव-कळंब-बीड असा जाणार असेल तर तो धाराशिव-कळंब-केज-बीड असा करावा अशी कळंब व केजच्या जनतेची मागणी आहे. याशिवाय येडशी-कळंब-केज-अंबेजोगाई-परळी किंवा अहमदनगर-पाटोदा-केज-अंबेजोगाई-घाटनांदूर या मार्गानेही केजला रेल्वे कनेक्टिव्हिटी दिली जाऊ शकते. केंद्रशासनाने यापैकी कोणत्याही एका योग्य व अनुकूल मार्गाने केज शहर व तालुक्याला रेल्वेसेवेशी जोडून द्यावे अशी मागणी केजच्या रेल्वे कृती समिती व केज विकास संघर्ष समितीने बीडचे खासदार बजरंग बप्पा सोनवणे आणि केज तहसीलदार यांना दिलेल्या निवेदनाद्वारे केली आहे. या मागणीसाठी वेळोवेळी पाठपुरावा करण्याचा निर्धार केज तालुका रेल्वे कृती समिती व केज विकास संघर्ष समितीने केला आहे. निवेदनावर हनुमंत भोसले, डी एस साखरे, नासेर मुंडे, महेश जाजू, प्रतापराव पाटील, शेषराव घोरपडे, संपत वाघमारे यांच्यासह नागरिकांच्या सह्या आहेत.
