गौतम बचुटे/केज :-
दि. ३१ जानेवारी रोजी रात्री १०:४५ वाजण्याच्या सुमारास केज तालुक्यातील चंदनसावरगाव जवळ झालेल्या दोन कारच्या भीषण अपघातात दोघे जागीच ठार झाले असून एकाची प्रकृती गंभीर आहे. या बाबतची माहिती अशी की, ३१ मार्च रोजी रात्री १०:४५ वा. च्या सुमारास महामार्ग क्र. ५४८-डी केज-अंबेजोगाई रोडवर चंदनसावरगाव जवळ असलेल्या नायरा पेट्रोल पंपा जवळ (एम एच-२३/ई ६८५२) आणि (एम एच-१२/एम डब्ल्यू-३५६३) या दोन स्विफ्ट कारची समोरा समोर जोराची धडक झाली. हा अपघात एवढा भीषण होता की, आवाजाने वस्ती आणि गावातील नागरिक अपघातस्थळी मोठ्या प्रमाणात दाखल झाले. या भीषण अपघातात दोघांचा जागीच मृत्यू झालेला असून एकजण गंभीर जखमी आहे. अपघातात मृत्यू पावलेले दोघे आणि एका जखमीची अद्याप ओळख पटलेली नाही. दरम्यान युसुफवडगाव पोलीस ठाण्याचे प्रभारी अधिकारी सहाय्यक पोलीस निरीक्षक मच्छिंद्रनाथ शेंडगे यांना माहिती मिळताच त्यांच्या आदेशाने बीट अंमलदार शेंडगे, हेडकॉन्स्टेबल पठाण, हेडकॉन्स्टेबल वारे व वाहन चालक हनुमंत गायकवाड हे अपघात स्थळी पोहोचले. पोलीसांनी मृतदेह बाहेर काढून जखमीला सरकारी दवाखान्यात हलविले आहे.
