जि.प.मा.शा.भाटुंबा शाळेतील विद्यार्थ्यांचे कौतुकास्पद यश
केज –
महाराष्ट्र शासनाची शिष्यवृत्ती परीक्षा ही अत्यंत प्रतिष्ठित आणि अवघड समजली जाणारी परीक्षा आहे . या परीक्षेत जि. प. मा. शा. भाटुंबा ता.केज शाळेची विद्यार्थिनी कु.प्रणिता नवनाथ गरड हिने शिष्यवृत्तीधारक (इ.८वी) होण्याचा बहुमान पटकावत शाळेची व स्वतःच्या कुटुंबाची मान परिसरात उंचावली आहे.
शासकीय क्रीडा विभागातर्फे दरवर्षी पावसाळी क्रीडा स्पर्धा आयोजित केल्या जातात, यावर्षी प्रथमच सहभागी होणाऱ्या कु.भक्ती किरण धपाटे या विद्यार्थिनीने तालुकास्तरीय बुद्धीबळ स्पर्धेत विजयी होत थेट जिल्हास्तरीय बुद्धिबळ स्पर्धेत धडक मारत गावाच्या शीर पेचात यशाचा तुरा रोवला आहे.
जि. प. मा. शा. भाटुंबा शाळेचे मुख्याध्यापक श्री.डाॅ. कंचनवार सर व त्यांचे सहकारी शिक्षकवृंद यांनी शाळेच्या नियमित ३६५ दिवस सुरु असलेल्या उपक्रमांचा हा परिपाक असल्याचे सांगितले.
विशेष म्हणजे गतवर्षीच्या ‘मुख्यमंत्री माझी शाळा सुंदर शाळा’ या स्पर्धेत देखील भाटुंब्याची शाळा तालुकास्तरावर उपविजेती ठरलेली आहे. गुणवत्ता, क्रीडा आणि व्यवस्थापन अशा सर्वच क्षेत्रात ही ग्रामीण भागातील भाटुंब्याची शाळा घौडदौड करत आहे.
होळ केंद्राचे के.प्र. श्री.चवरे सर, भाटुंबा गावातील सरपंच, उपसरपंच, पालकवर्ग आणि सर्वच प्रतिष्ठित नागरिकांनी विजेत्यांना शुभेच्छा दिल्या. तसेच परिसरातून देखील कु. प्रणिता गरड, कु. भक्ती धपाटे आणि शाळेचे कौतुक करण्यात येत आहे.
