मांजरा नदी पुलाच्या नादुरुस्त रस्त्याचे काम आंदोलनाच्या इशाऱ्यानंतर सुरू
केज विकास संघर्ष समितीने दोन दिवसांपूर्वी दिला होता बेमुदत रस्ता रोकोचा इशारा
केज:
खामगांव-पंढरपूर महामार्गावर केज तालुक्यातील मांजरा नदी पुलाजवळ अंदाजे एक किमी रस्ता गेली तीन वर्षांपासून अत्यंत वाईट अवस्थेत होता. या रस्त्यावर प्रचंड मोठे खड्डे, दगड-गोटे व धुळीमुळे प्रवाशी त्रस्त झाले होते. हा रस्ता पूर्णतः केज तालुक्यात येत असल्याने केज विकास संघर्ष समितीने गेली दोन वर्षांपासून सतत पाठपुरावा करत अनेक रस्ता रोको आंदोलने केली होती. मागील आंदोलनावेळी हे काम लोकसभा निवडणूक पार पडताच सुरू करू असे सांगितले होते मात्र संबंधित रस्ते बांधकाम कंपनी व एमएसआरडीसी याकडे दुर्लक्ष करत असल्याचे पाहून केज विकास संघर्ष समितीने नागरिकांचे, वाहनचालकांचे व इतर प्रवाशांचे हाल पाहून दि 19 जुन रोजी सर्व संबंधित यंत्रणा व युसूफवडगाव पोलीस स्टेशनला निवेदने देऊन या प्रश्नावर येत्या मंगळवार दि 2 जुलै 2024 रोजी सकाळी 11 वाजता या भागातील वाहनचालक व गावकऱ्यांच्या सहभागाने मांजरा नदी पुलावर बेमुदत रस्ता रोको आंदोलन करण्याचा इशारा देताच 22 जुलै रोजी संबंधित रस्ते बांधकाम कंपनीचे प्रभारी अभियंता श्री कोटेचा यांनी काम सुरू केल्याचे केज विकास संघर्ष समितीला कळविले आहे.
तरीदेखील काम पूर्ण झाल्यानंतरच केज विकास संघर्ष समिती आपले आंदोलन मागे घेईल. विहित मुदतीत हे काम पूर्ण न केल्यास किंवा काम थातुरमातुर केल्यास दिलेल्या तारखेला आंदोलन करण्याचा इशारा समितीच्या वतीने हनुमंत भोसले, नासेर मुंडे, शेषराव घोरपडे व संपत वाघमारे यांनी दिला आहे.
