अल्पवयीन शाळकरी मुलगी बेपत्ता
गौतम बचुटे/केज :- केज येथील अल्पवयीन मुलीचे शाळेच्या मध्यान्ह सुट्टीतून अज्ञात व्यक्तीने अज्ञात कारणासाठी अपहरण केले असल्याची तक्रार केज पोलीस ठाण्यात दाखल झाली आहे.
या बाबतची माहिती अशी की, दि. ५ मार्च रोजी सकाळी ७:३० वा. च्या सुमारास एका पालकांनी त्यांची इयत्ता ८ वीच्या वर्गात शिकत असलेली साडे तेरा वर्षाची मुलगी व मुलगा यांना नेहमी प्रमाणे शाळेत मोटार सायकलवर सोडुन ते परत गेले व नंतर ते सकाळी १०:०० वा. च्या सुमारास कामाला गेले. त्या नंतर दुपारी १२:३० वा.च्या सुमारास त्यांचा मुलगा हा एकटाच घरी आला. म्हणून मुलीच्या आईने मुलगी घरी आली नाही अशी कल्पना पतीला दिली. त्यांनी तिचा शोध घेतला आणि नंतर शाळेत जाऊन चौकशी केली असता शिक्षकांनी सांगितले की, सदर मुलगी ही शाळेचे दप्तर व डबा वर्गात ठेवून ती मध्यान्ह मध्ये बाहेर गेल्या नंतर वर्गात आलेली नाही. तिच्या अंगावर शाळेचा गणवेश असून पायात काळ्या रंगाचे सँडल्स, कानात साधे फुले, नाकात खडा व हनुवटीवर मस आहे. या वर्णनाची मुलगी आढळून आल्यास त्या बाबत जवळच्या पोलिसांना कळवण्याचे आवाहन करण्यात आले आहे. मुलीच्या वडिलांच्या तक्रारी वरून अज्ञात अपहरणकर्त्या विरुद्ध केज पोलीस ठाण्यात गुन्हा दाखल करण्यात आला आहे.
