पुन्हा अतिक्रमण झाल्यास ‘झोपडपट्टी दादा कायद्या नुसार होऊ शकते कारवाई !
गौतम बचुटे/केज :- शासकीय जागेवर अतिक्रमण करून त्या जागा किरायाने देऊन सक्तीने भाडे वसुली करणाऱ्या विरुद्ध संघटित गुन्हेगारी अंतर्गत महाराष्ट्र झोपडपट्टी दादा कायद्या नुसार कारवाई करणार असल्याचे संकेत अधिकाऱ्यांनी दिले आहेत.
केज शहरातील महामार्ग आणि सरकारी कार्यालयाच्या परिसरातील अतिक्रमणे प्रशासनाने दि. १६ जून रोजी २४ तास ऑन ड्युटी करून रस्त्यावर भर उन्हात उभे राहून अतिक्रमणे हटविली. मात्र पुन्हा कोणी सरकारी जागेवर अतिक्रमण करून ती भाड्याने देऊन व्यावसाईकाकडून भाडे वसूल करीत असल्याची माहिती मिळाल्यानंतर कारवाई होणार असल्याचे समजते .
दरम्यान केज शहरातील बहुतांशी अतिक्रमणे हटली असून पुन्हा जर कोणी अशा प्रकारची आगळीक करून अतिक्रमण केले. तर त्या-त्या विभागाचे प्रमुख यांनी तक्रार केल्यास आगळीक करणाऱ्या विरुद्ध संघटित गुन्हेगारी कायदा आणि महाराष्ट्र झोपडपट्टी कायद्या अंतर्गत कारवाई केली जाऊ शकते. अशी माहिती अधिकाऱ्यांनी दिली.
————————————————
काय आहे झोपडपट्टी दादा कायदा ? :- या कायद्या अंतर्गत एखाद्यावर पोलीस ठाण्यात गुन्हा दाखल झाल्यास आरोपीला एका वर्षासाठी तात्काळ स्थानबध्द (तुरूंगवास) करण्यात येते. या विरोधात केवळ उच्च न्यायालय व मंत्रालयातच दाद मागता येते.
————————————————
